Над 1.300 кривични дела поврзани со семејно насилство во првите девет месеци од 2026 година

Вкупно 1.337 кривични дела поврзани со семејно насилство се регистрирани на територијата на државата во периодот од јануари до септември 2026 година, за кои се пријавени 1.388 сторители и 1.433 жртви, информира Министерството за внатрешни работи.

Според податоците на МВР, од пријавените сторители 1.278 се мажи, а 110 се жени. Меѓу жртвите се евидентирани 1.144 жени и 289 мажи.

Во истиот период полицијата регистрирала и 191 прекршок поврзан со семејно насилство, со 228 пријавени сторители, од кои 196 мажи и 32 жени. Како жртви се евидентирани 221 лице, од кои 126 мажи и 95 жени.

Дополнително, евидентирани се 3.869 поплаки за семејно насилство. Во овие случаи биле пријавени 3.971 сторител, од кои 3.090 мажи и 881 жена, како и 3.961 жртва, меѓу кои 2.567 жени и 1.394 мажи.

Од Министерството за внатрешни работи упатуваат апел до граѓаните да не молчат и да не го премолчуваат семејното насилство, туку навремено да го пријавуваат секој случај.

Секој што е жртва на семејно насилство, но и секој што има сознанија за вакви случаи, може да ги пријави во најблиската полициска станица или на телефонските броеви 112 и 192.