Свет
Рубио: Нема докази дека прекините на услугите во САД се поврзани со злонамерни активности
Американскиот државен секретар, Марко Рубио, изјави дека нема апсолутно никакви докази за поврзаност меѓу неодамнешните прекини на различни услуги што предизвикаа проблеми во транспортот, го ограничија пристапот до банкарските услуги и ги засегнаа заштитените комуникации, ниту, пак, за вмешаност на злонамерен субјект.
Рубио се обиде да ги смири Американците за време на патувањето со претседателот Доналд Трамп од Манила до кинескиот град Шенжен, каде што претстојат важни средби со лидерите на Кина и на Русија – Шји Џјинпинг и Владимир Путин.
„Немаме никакви докази, ниту причина да веруваме дека некој од овие изолирани и поединечни случаи има каква било поврзаност со злонамерни лица, хакери, криминалци, друга држава или каков било злонамерен субјект“, изјави Рубио.
Трамп се соочи со бран критики и барања Белата куќа да преземе одговорност за серијата прекини и технички дефекти низ целата земја.
Дури и некои од најверните поддржувачи на Трамп ја обвинија неговата администрација дека ги лаже американските граѓани и крие информации за вистинските причини за техничките проблеми, кои во изминатите денови ги погодија системите на „Мајкрософт“, „Чејс банк“, службите за контрола на воздушниот сообраќај и американската Агенција за национална безбедност.
Секој од прекините беше објаснет со внатрешни технички проблеми, а засегнатите компании и државни агенции негираа дека биле цел на кибернапади.
Рубио денеска изјави дека САД „не се соочуваат со систематски напад“.
По пристигнувањето во Азија, Трамп не покажа особена загриженост и изјави дека „такви работи се случуваат“.
Поранешната портпаролка на Белата куќа, Каролин Ливит, упати неколку совети до своите поранешни колеги во администрацијата на Трамп.
„Би ѝ порачала на Белата куќа дека транспарентноста е од клучно значење“, изјави Ливит за телевизијата „Фокс њуз“. Таа посочи дека по враќањето од Кина, Трамп или некој друг претставник на Белата куќа ќе треба да даде објаснување за ситуацијата „за да се смират тензиите“.
Подоцна, Ливит на својот профил на социјалната мрежа Икс сподели видео со коментар на директорот на американското национално разузнавање, Џеј Клејтон, по однос прашањето. Во интервју за „Фокс бизнис нетворк“, тој изјави дека по внимателното разгледување на ситуацијата, разузнавачките служби заклучиле дека не станува збор за „инцидент поврзан со кибернапад“.
Клејтон додаде дека, според американската Влада, инцидентите се последица на мерките за подобрување на безбедноста што ги презеле некои организации, а кои одзеле повеќе време од планираното и наишле на неочекувани тешкотии.
Скептицизам од своја страна изрази Триша Меклафлин, поранешна помошник-секретарка за јавни прашања во Министерството за внатрешна безбедност.
„Американците не се глупави“, напиша таа на социјалните мрежи. „Сакаме и заслужуваме да знаеме што навистина се случува“, додаде Меклафлин.
ноември 18, 2026


