УНЕСКО препорачува впишување на јапонската калиграфија „шодо“ на листата на културно наследство

Советот за проценки при УНЕСКО препорача впишување на јапонскиот краснопис, познат како „шодо“, на листата на светското нематеријално културно наследство. Како што денес соопшти јапонската Влада, официјална одлука се очекува на седницата на Меѓувладиниот комитет на организацијата, којашто ќе се одржи од 30 ноември до 5 декември во Шијамен, Кина.

Проценителното тело на УНЕСКО истакна дека калиграфијата „шодо“ сè уште е широко распространета во Јапонија и се пренесува на училишта, преку клубови и други образовни активности, со што културните знаења и вредности се пренесуваат од една генерација на друга. Според ова тело, ваквото впишување би помогнало да се подигне свеста за културната и уметничката вредност на калиграфијата како жива традиција и би поттикнало културен дијалог. Санае Такаичи, висока јапонска функционерка, изјави дека е „многу задоволна“ што „шодо“ – коешто таа го опиша како важен дел од културното наследство на Јапонија, е оценето како достојно за признание од УНЕСКО. 

Јапонскиот Совет за културни прашања го избра „шодо“ за номинација во 2023., а документацијата беше доставена до УНЕСКО во 2025 година. Доколку биде впишано, „шодо“ ќе стане 24-от дел од јапонската култура во овој список, каде што веќе се наоѓаат традиционалните знаења и вештини поврзани со производството на саке и шочу.

„Шодо“ е традиционален уметничко-пишан облик на краснопис што користи кинески и јапонски букви. Според наводите, Јапонија развила свои, посебни стилови на пишување откако го усвоила кинескиот систем на пишување. Кинескиот краснопис е веќе вклучен на листата на УНЕСКО.