Кралот Чарлс на турнејата по Карибите

Британскиот крал Чарлс Трети почнува турнеја по Карибите во време кога се зголемуваат повиците тој да се извини за улогата на Британија во трговијата со робови, пренесе ДПА.

Чарлс ќе пристигне во Антигва на деветдневна посета на регионот, откако генералната секретарка на Комонвелтот, Ширли Ботчвеј, минатата недела во интервју изјави дека „не би било штетно“ доколку кралот упати извинување.

Тој ќе претседава со Самитот на шефови на влади на Комонвелтот во Антигва, кој се одржува на две години, каде што ќе му се придружи и кралицата, а исто така ќе оствари и самостојна државна посета на Гвајана.

Претседателот на Гвајана, Мохамед Ирфаан Али, неодамна изјави дека Чарлс го признал ропството како еден од најтемните периоди во човечката историја, но додаде дека преминувањето кон формално извинување е „следниот чекор“.

Прашањето за репарации – финансиска компензација или други облици на обесштетување од страна на нациите кои тргувале со робови – веројатно ќе биде уште една тема за која ќе се бара негов став.

Британскиот крал ги следи насоките на своите министри, а се верува дека владата му нема препорачано да понуди извинување или репарации, што е во согласност со веќе востановената политика.

Во март, Генералното собрание на Обединетите нации со убедливо мнозинство поддржа резолуција со која трансатлантската трговија со робови се прогласува за „најтешкото злосторство против човештвото“, при што Обединетото Кралство и земјите членки на ЕУ беа меѓу 52-те држави кои беа воздржани за време на гласањето.

Министерот за надворешни работи, Ед Милибанд, кој се очекува да присуствува на самитот заедно со премиерот Енди Барнам, неодамна ја потврди позицијата на владата во интервју за дигиталниот весник „Политико“, изјавувајќи: „Не мислам дека репарациите се одговорот, и за тоа веќе имам разговарано со некои од нашите колеги од Комонвелтот“.

Портпаролот на Бакингемската палата, при објавувањето на деталите за посетата претходно овој месец, изјави: „Во различни форуми се водат важни дискусии за колонијалното наследство и меѓугенерациското влијание на трансатлантската трговија со заробени лица“.

– Иако тоа се првенствено прашања за кои треба да одлучуваат владите, претходните изјави на Неговото Височество по овој повод беа недвосмислени, опишувајќи ги тие настани како „грозоморност“ која засекогаш ја оцрнува нашата историја – додаде тој.

Портпаролот нагласи дека „програмата за посетата нема да бега од ’најтемните денови на нашето минато‘, како што ги опиша Неговото Височество, туку, во согласност со желбите на земјите домаќини, првенствено ќе биде насочена кон сегашноста и ветувачката иднина на секоја земја, со програми развиени во блиска консултација со нивните влади за да се одразат нивните индивидуални приоритети“.

– Важно е овде да се одбележи и работата што Неговото Височество ја врши веќе со години за да ги признае грешките од минатото и да најде креативни начини за исправање на нееднаквостите што траат. Како што би се очекувало, за време на посетата ќе се најдат можности да се одрази и да се обнови неговата лична, искрена и континуирана посветеност на тој процес – додаде портпаролот.