Кошта: Ниту една земја не може сама да изгради траен мир

Ниту една земја не може сама да изгради траен мир, да спречи пандемии, да ја стабилизира климата, да обезбеди синџири на снабдување, да ја регулира вештачката интелигенција, да ја зачува финансиската стабилност или да обезбеди одржлив развој, изјави претседателот на Европскиот совет, Антонио Кошта, истакнувајќи го значењето на мултилатерализмот во справувањето со глобалните предизвици.

„Мултилатерализмот не е идеал од минатото, туку единствениот реален начин да се одговори на проблемите на денешницата“, рече Кошта во обраќањето пред Генералното собрание на Обединетите нации, додавајќи дека ниту една земја, „колку и да е моќна, не може сама да изгради траен мир“

Тој повика на зајакнување на мултилатерализмот што ги штити човековите права, ја зајакнува демократијата и ја унапредува родовата еднаквост.

Кошта рече дека неколку глобални компании не можат сами да ја регулираат вештачката интелигенција, истакнувајќи дека Обединетите нации мора да придонесат за воспоставување глобални стандарди преку Глобалниот дигитален договор.

И покрај геополитичката поларизација, финансиските ограничувања и слабостите на институциите, „одговорот не е повлекување“, рече Кошта, повикувајќи ги земјите „да реформираат, обноват и повторно да инвестираат“.

Тој ги осуди заканите и нападите врз Меѓународниот кривичен суд и неговите вработени, истакнувајќи дека одговорноста не смее да зависи од политичките интереси.

„Меѓународното право важи насекаде“, порача Кошта.

Тој предупреди дека конфликтите никогаш не остануваат локализирани, посочувајќи на нивните последици врз безбедноста на храната, енергетските пазари, миграцијата, развојот и глобалната стабилност.

Војната во Украина ги покажува таквите последици, рече Кошта, повикувајќи ја меѓународната заедница да ги искористи сите расположливи средства за да се стави крај на војната.

Тој истакна дека истото се однесува и на Газа и страдањето на милиони цивили.

Кошта ги поддржа напорите за изнаоѓање решение за ситуацијата во Иран, истакнувајќи дека прекинот на огнот мора да се почитува и дека мора да се зачува слободата на пловидба низ Ормуската Теснина.

„Иран никогаш не смее да добие нуклеарно оружје“, истакна Кошта, изразувајќи надеж дека неговите граѓани ќе можат да живеат во мир и безбедност „како слободни мажи и жени“.