Кремљ повтори дека не се исполнети предусловите за отпочнување преговори со Украина

Портпаролот на Кремљ, Дмитриј Песков, денеска повтори дека не се исполнети предусловите за отпочнување мировни преговори со Киев.

– Милитаризацијата на Украина продолжува. Европските земји се обидуваат да пронајдат уште повеќе пари за купување оружје. Киевскиот режим ги продолжува своите терористички активности – изјави Песков на редовната прес-конференција.

Портпаролот на Кремљ го коментираше повикот на претседателот на САД, Доналд Трамп, и украинскиот претседател Володимир Зеленски за енергетско примирје.

– Но ние, руската страна, остануваме отворени за мировни преговори – додаде Песков, повторувајќи дека рускиот став не е променет во однос на средбата меѓу лидерите на Русија и Украина.

Портпаролот на Кремљ повтори дека рускиот претседател Владимир Путин претходно изјави оти Зеленски може да дојде во Москва доколку сака и дека би ги добил потребните безбедносни гаранции.

Песков додаде дека таквата средба, доколку се одржи „пред да биде завршена работата на експертско ниво“, би била само губење време.