Берово со богата празнична програма ја дочекува Новата 2026 година

Берово и годинава ќе биде во знакот на празничната магија, музиката и традицијата, со повеќедневна програма што ќе се реализира од крајот на декември 2025 до почетокот на јануари 2026 година. Организаторите најавуваат настани за сите генерации, со акцент на фолклорот, семејната забава и новогодишната атмосфера во центарот на градот.

Како што информираат од Општина Берово, празничната програма започнува вечерва (22 декември) со традиционалниот новогодишен концерт на КУД „Димитар Беровски“. Концертот ќе се одржи со почеток во 18:00 часот во ОСУ „Ацо Русковски“ во Берово, а публиката ќе има можност да ужива во богат фолклорен репертоар кој ќе ја најави празничната атмосфера во градот.

Празничните настани продолжуваат на 27 декември 2025 година, со почеток во 18:00 часот, кога на Плоштадот „Димитар Беровски“ ќе се одржи „Грин-Џ – Winter Street Festival Caravan“. Фестивалот ќе понуди улични уметници и перформанси, детска зона, како и зимска гастро зона, а наменет е за целото семејство и создавање топла зимска атмосфера на отворено.

На 2 јануари 2026 година, со почеток во 12:00 часот, на градскиот плоштад ќе настапи Кристијан Бенито, ќе пристигне Дедо Мраз, а ќе биде организирана и музичка забава со диџеи, наменета пред сè за најмладите посетители.

Завршниот дел од празничната програма е предвиден за 7 јануари 2026 година, исто така со почеток во 12:00 часот, кога на Плоштадот „Димитар Беровски“ ќе настапат Ана и Пријателите, со музичка програма по повод божиќните празници.

Настаните се организираат со поддршка од локални спонзори и поддржувачи, со цел да се создаде пријатна празнична атмосфера и содржини достапни за сите граѓани и посетители на Берово. Со ваквата програма, Берово уште еднаш ја потврдува својата определба празниците да ги одбележи со богати културни и забавни содржини.