Во завршна фаза есенската дератизација во Општина Кисела Вода, опфатени над 2.000 шахти

Во завршна фаза е редовната есенска дератизација на територијата на Општина Кисела Вода, при што досега се опфатени над 2.000 шахти во речиси сите месни и урбани заедници.

Активностите ги спроведува специјализираната компанија „Токсивет“, а за целосно завршување на акцијата останува уште урбаната заедница Бирарија, каде што екипите ќе работат утре.

Со дератизацијата се врши системско уништување на штетните глодари и спречување на нивното размножување, со цел заштита на здравјето на жителите и унапредување на хигиенските услови во општината.

Од Општина Кисела Вода информираат дека, согласно програмата на Секторот за комунални работи, инфраструктура, сообраќај и заштита на животната средина, дератизацијата редовно се спроведува двапати годишно, во пролет и во есен.

Со овие активности, како што посочуваат од Општината, се обезбедува превенција од заразни болести и побезбедна животна средина за граѓаните.