Нови судири меѓу полицијата и демонстрантите во Тирана

Двајца демонстранти се приведени по судирите со полицијата пред зградата на албанската влада во Тирана, откако одбиле да платат казна, пренесе албанската новинска агенција АТА. Откако насобраните демонстранти се обиделе да го спречат полициското возило да го напушти местото со двајцата мажи што ги привеле полициските службеници, полицијата употреби солзавец за да ги растера демонстрантите.

Вчерашниот протест следеше по демонстрациите на студентите, кои тргнаа од Политехничкиот универзитет во Тирана и поминаа покрај Економскиот факултет и Министерството за образование, каде што останаа неколку часа, наведува АТА. Потоа тие се упатиле кон кабинетот на премиерот Еди Рама.

Студентските протести во Албанија траат веќе неколку недели и се насочени против владата на премиерот Еди Рама, потсетува албанската агенција. Демонстрантите бараат негова оставка, подобри услови во образованието, пониски школарини и преземање мерки против корупцијата.

Протестите во Албанија започнаа во Тирана на 13 октомври, во услови на незадоволство од лошите услови на универзитетите, високите трошоци за високото образование, недоволната финансиска поддршка за студентите и ограничените можности за вработување по дипломирањето.

Во изминатите денови демонстрациите поминаа низ периоди на ескалација и релативно смирување. На 31 октомври демонстрантите запалија контејнери за отпад и фрлаа камења и молотови коктели кон полицајците, а шест лица беа уапсени по протестот во Тирана.

На 3 ноември, вкупно 16 лица добиле парични казни во врска со демонстрациите, обележани со насилство и материјална штета.

Рама во неколку наврати им предложи дијалог на демонстрантите, но студентите продолжуваат да ги одбиваат неговите покани и инсистираат на негова оставка.