Connect with us

Свет

Италија го усвои законот за антисемитизам и покрај противењето на опозицијата

Италијанскиот парламент го одобри законот за борба против антисемитизмот, што ја вклучува спорната дефиниција на овој термин, а критичарите предупредуваат дека неговата имплементација би можела да ја ограничи слободата на изразување и застапувањето на палестинските права.

Долниот дом на парламентот синоќа го усвои законот со 147 гласови „за“ и 93 „против“, објави Аднкронос.

Со законот се  прифаќа дефиницијата за антисемитизмот на Меѓународната алијанса за сеќавање на холокаустот (IHRA), која наведува некои форми на критика кон Израел како примери на антисемитско однесување.

Опозициските партии проценуваат дека законот би можел да го обесхрабри јавното застапување на палестинските права и постојано ја повикуваат владата да ја промени дефиницијата.

Владејачката коалиција на премиерката Џорџа Мелони ги отфрла овие критики и тврди дека политичката критика кон Израел останува заштитена.

Законот не предвидува парични казни или кривични санкции за прекршителите.

„Десницата го користи законот за антисемитизам за да ги задуши критиките“, рече еден од лидерите на Зелено-левичарската алијанса, Анџело Бонели.

Претседателката на Унијата на италијански еврејски заедници, Ливија Отоленги, го поздрави усвојувањето на законот, оценувајќи дека тој ќе ги зајакне „демократските антитела“ на италијанското граѓанско општество.

Некои пратеници од Демократската партија, главната опозициска партија, се воздржаа од гласање, и покрај повиците од раководството на партијата да гласаат против законот, посочувајќи на внатрешни поделби околу ова прашање.

Поддржувачите на законот рекоа дека е потребна посилна заштита поради зголемувањето на антисемитските инциденти од почетокот на војната во Газа.

Италијанската опсерваторија за антисемитизам регистрираше 963 случаи во текот на 2025 година, речиси четири пати повеќе отколку во 2022 година.

Ad
Ad