Три морнарички дронови погодија контејнерски брод во Црното Море покрај бугарскиот брег

Контејнерски брод што пловел под знамето на Либерија бил погоден од три морнарички дронови во Црното Море, на околу 40 километри од Шабла, на североисточниот брег на Бугарија, објави денеска бугарскиот министер за одбрана Димитар Стојанов.

Стојанов го потврди нападот за време на трилатералниот состанок во Софија со турскиот министер за одбрана, Јашар Ѓулер, и романскиот министер за одбрана, Стефан Раду-Опре, како и началниците на генералштабовите на трите земји кои разговараа за регионалната безбедност, објавува „Новините“.

Порталот Maritime.bg објави дека бил нападнат бродот „Contship jet“, што пловел под знамето на Либерија, а претходно отпловил од Хаифа во Израел кон романското пристаниште Констанца.

Според порталот, танкер е испратен да му помогне на бродот, додека екипажот е евакуиран на чамците за спасување.

Првично беше објавено дека екипажот го напуштил бродот, но засега нема информации за неговата состојба или обемот на штетата на бродот.

„Додека овој состанок беше во тек, контејнерски брод беше погоден во крајбрежната зона од три поморски дронови. Локацијата се наоѓа на околу 21 милја од Шабла“, рече Стојанов.

Тој им се заблагодари на своите колеги од Турција и Романија што се согласија да учествуваат на состанокот во краток рок поради влошувањето на безбедносната состојба во Црното Море.

Стојанов оцени дека нивното присуство ја покажува заедничката решителност на трите земји да одговорат на регионалните предизвици.

Бугарија, Романија и Турција усвоија заедничка изјава во која ги осудуваат нападите врз цивилниот поморски сообраќај.

Стојанов оцени дека овие инциденти претставуваат опасна ескалација и сериозно ја загрозуваат безбедноста на пловидбата.

„Повикуваме на итен прекин на нападите што ги загрозуваат трговските бродови, поморската инфраструктура и безбедноста на поморските активности“, рече Стојанов.

Тој додаде дека трите земји се согласиле за воспоставување трилатерален координативен механизам во Црното Море, што ќе вклучува редовни консултации, размена на информации и понатамошни практични чекори за зајакнување на регионалната безбедност и стабилност.

Министрите, исто така, се согласија да одржат дополнителни состаноци во блиска иднина.

„Ризиците се зголемуваат од ден на ден и мора да имаме соодветен одговор“, рече Стојанов.

Според порталот Maritime.bg, бродот „Contship jet“ бил на околу 11 километри од ’ртот Калијакра кога бил нападнат.

Најновиот инцидент доаѓа по серијата воздушни и поморски напади со беспилотни летала врз трговски бродови во близина на бугарскиот и романскиот брег во октомври, поттикнувајќи сè почести проценки дека Црното Море станало најопасниот воден пат во светот.

Maritime.bg наведува дека во последните недели, неколку бродови биле потонати или оштетени во слични инциденти, вклучувајќи ги „Rjoyad Mammadov“, „Alfa Watan“, „HS digence“, „Able“ и „Chelsea-3“.