Јужна Кореја ја обвини Северна Кореја за експлозијата во демилитаризираната зона и за кршење на примирјето

Севернокорејските мини ја предизвикаа експлозијата од минатата недела во која беа повредени двајца припадници на јужнокорејските сили во демилитаризираната зона (ДМЗ) – изјави денеска јужнокорејскиот министер за одбрана Канг Пин-чул додавајќи дека инцидентот го прекршил договорот за примирје од Корејската војна и бара одговор од Пјонгјанг.

Министерот Канг, денеска, пред парламентарниот комитет изјави дека мините се севернокорејски и се чини дека биле поставени како дел од работата за демаркација на Северна Кореја во близина на воената демаркациска линија (МДЛ), која ја сече ДМЗ.

„Одговорноста е на Северна Кореја и ние ќе преземеме соодветни мерки“, рече Канг додавајќи дека војската има неколку опции за одговор што ќе ги спроведува постепено одбивајќи да даде подетално објаснување.

Канг рече дека прашањето за намерата се однесува на тоа дали Северна Кореја ги поставила мините знаејќи дека јужнокорејските војници би можеле да влезат во областа и да бидат убиени.

Јужнокорејскиот Здружен генералштаб објави дека истрагата спроведена со Командата на Обединетите нации пронашла уште една севернокорејска противпешадиска мина во близина на местото на експлозијата од минатата недела.

Војската соопшти дека новооткриената мина се разликува од севернокорејските мини за кои се верува дека ја предизвикале експлозијата на 21 септември.

По сличен инцидент во 2015 година, во кој јужнокорејски војници беа повредени од експлозија на севернокорејска мина, Сеул повторно почна со емитување антисевернокорејски пропагандни пораки преку звучници по должината на демилитаризираната зона предизвикувајќи воен судир, што заврши со договор на високо ниво меѓу двете Кореи.

Последната експлозија доаѓа во време кога јужнокорејскиот претседател Ли Џе-мјунг се обидува повторно да ја ангажира Северна Кореја за дијалог откако Пјонгјанг ја прогласи Јужна Кореја за непријателска држава и се откажа од својата долгогодишна цел за мирно обединување.

Севернокорејските државни медиуми не коментираа за инцидентот. Севернокорејската мисија во ОН и нивните амбасади во Пекинг и Сингапур не одговорија веднаш на испратеното барање за одговор по електронска пошта.