Предвидувањето од студија за крајот на светот на 13 ноември 2026 година не се остварува

Euronews/BFM/RFI/БТА

Денеска е петок 13-ти – датум што ги плаши суеверните луѓе. Оваа година, во пресрет на денот, голем број француски медиуми, како што се BFM TV, RFI, Scientifique et Vie и француската програма на Euronews, исто така потсетија дека крајот на светот е предвиден за 13 ноември 2026 година, но нагласија дека предвидувањето нема шанси да се оствари.

Пред 66 години, се појави статија со провокативен наслов „Судниот ден ќе биде петок, 13 ноември 2026 година“, напишана од австриско-американскиот физичар Хајнц фон Ферстер и неговиот истражувачки тим и објавена во престижното научно списание Science.

Во статијата, научниците анализирале историски податоци за светската популација во текот на изминатите два милениума и создале крива на раст врз основа на тие бројки. Моделот покажал дека временскиот интервал помеѓу секое удвојување на популацијата постојано се скратува.

Нивната прогноза беше следнава: ако набљудуваната стапка на раст на светската популација остане непроменета и се екстраполира во иднина, кривата би достигнала бесконечна вредност во ноември 2026 година. Логичкиот заклучок на математичарите беше дека на 13 ноември 2026 година, човештвото, барем теоретски, би се „смачкало“ под тежината на сопствената пренаселеност.

Целта на статијата не беше да ги исплаши луѓето, туку да ја нагласи опасноста од пренаселеност на планетата. Но, публикацијата предизвика огромен одѕив поради својата мрачна прогноза.

До почетокот на 1990-тите, кривата на прогнозата изненадувачки точно се совпаѓаше со реалните податоци на научниците.

После тоа, сепак, растот на светската популација значително се забави, поради што денешните прогнози повеќе укажуваат на стабилизација на популацијата на планетата. Таа продолжува да расте, но со се побавно темпо.

Првично, бројот на луѓе нагло се зголеми, подоцна, сепак, семејствата низ целиот свет почнаа да имаат помалку деца. Најбрзиот раст на населението е забележан во 1963 година, кога надмина 2% годишно. До 2020 година, таа стапка паднала под 1%.

Според проценките на ОН, околу средината на 80-тите години од 21 век, населението на Земјата ќе достигне приближно 10,3 милијарди луѓе – нејзината максимална вредност. После тоа, светската популација постепено ќе почне повторно да се намалува.

Ова не е првпат да се прават предвидувања за крајот на светот.

Во 1910 година, поминувањето на Халеевата комета предизвика голема паника. Весниците предупредуваа за токсични гасови во нејзината опашка што би можеле да ги уништат сите форми на живот. Некои трговци ги искористија стравовите на луѓето и почнаа да продаваат гас-маски, заштитни апчиња, па дури и специјални „чадори за заштита“. Но, кометата помина и ништо не се случи.

И во следните години, редовно се објавуваа нови датуми за апокалипсата.

На пример, американски радио проповедник предвиде дека „Судниот ден“ ќе се случи на 21 мај 2011 година.

21 декември 2012 година го означи крајот на одреден период во календарот на Маите, што од многумина беше протолкувано и како крај на светот.

Во 1972 година, студија насловена како „Границите на растот“ предупреди дека човештвото наскоро ќе остане без важни природни ресурси. Сепак, човештвото откри нови извори и решенија, така што цените на многу суровини дури и станаа пониски.

Проблемот со таквите прогнози е секогаш ист: трендовите забележани во минатото едноставно се пренесуваат од луѓето што ги прават прогнозите во иднината. При правењето на овие прогнози, се заборава дека луѓето реагираат на проблемите и се прилагодуваат на променливите услови, забележува Euronews.

Тоа важи и за 13 ноември 2026 година.

Човештвото еволуирало на сосема поинаков начин од оној што научниците го пресметале пред 66 години. Затоа, ако сакате да бидете искрени со вашиот шеф денеска затоа што мислите дека светот завршува денеска, подобро размислете двапати пред да дејствувате, советува Euronews.