Утврдена предлог-одлука за именување претседател и членови на Одборот за доделување на државната награда „Гоце Делчев“

Комисијата за прашања на изборите и именувањата едногласно утврди предлог-одлука за именување на претседател и членови на Одборот за доделување на државната награда „Гоце Делчев“. Ова следуваше откако Министерството за образование и наука согласно Законот за државните награди, испратило допис дека бил истечен мандатот на претседателот и членовите на Одборот за доделување на државната награда „Гоце Делчев“.

Согласно дописот од Министерството за образование и наука, за претседател е предложен академик Живко Попов. За членови се предлагаат Елизабета Илиевска, Драгана Кузмановска, Мерсим Максути, Авзи Мустафа, Христина Рунчева, Зоран Марков, Валентин Мирчевски, Зоран Мисајлески, Филип Поповски, Тошо Арсов, Марко Спасов и Оливер Станков. 

Претседателот на Комисијата, Ѓорѓија Сајкоски извести дека е повлечен материјалот, предлог-одлука за избор на членови на Советот за граѓански надзор, поднесена до Собранието на 9 јули 2026 година. Повлечен е и материјалот, предлог-кандидат за именување на член на Регулаторната комисија за енергетика, водни услуги и услуги за управување со комунален отпад на Република Македонија, поднесен до Собранието на 9 јули 2026 година.

– Бидејќи овие материјали се повлечени, ќе се објават два нови огласи, и тоа оглас за членови на Советот за граѓански надзор и оглас за Регулаторната комисија за енергетика, водни услуги, за управување со комунален отпад на Република Македонија – појасни Сајкоски. 

Комисијата за избори и именувања едногласно ја утврди предлог-одлуката за изменување и дополнување на одлуката за избор на претседатели, заменици на претседатели, членови и нивни заменици на комисиите на Собранието на Република Македонија.

-Врз основа на дописот од координаторот на пратеничката група на ВЛЕН, со оваа предлог-одлука се предлагаат измени и дополнувања во составот на комисиите на Собранието на Република Македонија и истата е прикачена на е-Парламент – рече Сајкоски.