Пристигна нова група американски волонтери во земјата

Новатa група Американци што ќе служат како волонтери во Мировниот корпус пристигнале вчера во земјата. Тие ќе го споделат своето знаење и искуство преку волонтирање во разни институции, училишта и организации во земјата.

Како што соопштија од Мировниот корпус, волонтерите на аеродромот биле пречекани од страна на директорот на Мировниот корпус во Северна Македонија, Дејвид Рисајд, како и од дел од вработените. 

– Денес одбележуваме значаен јубилеј – славиме 30 години постоење и работа во Северна Македонија и го поздравуваме пристигнувањето на 42 Американци од 29-тата група волонтери на Мировниот корпус, кои ќе служат во земјата. Овие 42 Американци ќе бидат распоредени да живеат и работат во заедници во целата земја. Благодарни сме на соработката што во изминатите 30 години ја добивме од Владата на Северна Македонија и од нашите партнери, со што поддржавме повеќе од 980 наши волонтери да служат овде од 1996 година наваму – посочил Рисајд.

За време на двегодишниот престој во Македонија волонтерите ќе работат како наставници по англиски јазик во училиштата, како и во полето на инклузивното образование и на развој на заедницата – во невладините организации и во општините. Мировниот корпус има одлична соработка со своите локални и национални партнери и ги спроведува своите програми во партнерство со Министерството за образование и наука и Министерството за локална самоуправа.

Ова е 29-та група волонтери што ќе живеат и работат во градови и села во Македонија. Во текот на првите три месеци волонтерите ќе ги учат 
локалните јазици и ќе се запознаваат со локалната култура. Тие ќе почнат со официјална служба во декември 2026 година и официјално ќе станат дел од групата од речиси илјада американски државјани што служеле во Македонија од 1996 година.