Слукас: Ако не ги оправдам очекувањата, оваа сезона ќе ми биде последна

Капитенот на Панатинаикос, Костас Слукас, зборуваше за своето закрепнување од повредата и призна дека претстојната сезона може да му биде последна.

– Сега сум во добра фаза на закрепнување и мислам дека ќе му се приклучам на тимот за 15-20 дена. Барем, така се надевам, рече 36-годишниот кошаркар.

Слукас објасни дека се вратил на тренинзите по операцијата, но доживеал дополнителен напор за време на претсезонскиот натпревар против ПАОК. 

Наместо планираните помалку од 10 минути, тој играл околу 30 минути, вклучувајќи го и продолжението, по што му се појави оток во ногата. Како резултат на тоа, го пропуштил целото лето.

– Ако не можам да ги исполнам очекувањата поставени врз мене како капитен и играч, оваа сезона ќе биде мојата последна. Ќе видам и како ќе се чувствува моето тело. Но, не мислам дека мојата кариера ќе трае уште долго. Сакам да ја завршам додека сè уште играм на високо ниво, истакна четирикратниот шампион на Евролигата.

Во првото коло од новата сезона во Евролигата, Панатинаикос на 24 септември ќе го пречека Париз.