Американскиот активист Чарли Кирк бил убиен поради неговите политички ставови, оценуваат обвинителите

Тајлер Робинсон, обвинет за убиство на американскиот конзервативен активист Чарли Кирк, го извршил нападот поради неговите политички ставови, оценуваат обвинителите, наведувајќи го противењето на Кирк за истополовите бракови и трансродовите права, објавија британските медиуми.

Коментарите на обвинителите во судските документи се најобемни досега за наводниот мотив за пукањето врз Кирк на универзитет во американската држава Јута, на 10 септември 2025 година. Тие наведоа писмо доставено како доказ од пријател на Кирк во кое се вели дека целта на активистот била да промовира конзервативни вредности и дека „експериментирањето со сексуален/родов идентитет е грев“ и дека „хетеросексуалноста во бракот е единствениот доблесен модел за сексуалност“.

Обвинителите сметаат дека писмото од соработникот на Кирк, Дејвид Енгелхард, покажува дека Кирк претставува „не само религиозно, туку и политичко движење против истополовите бракови и прифаќањето на трансродовството, хомосексуалноста и сексуалното експериментирање“.

Во обвинението се тврди дека „начинот на живот“ на Робинсон бил во спротивност со религиозните и политичките ставови на Кирк и дека 23-годишникот го нападнал активистот поради тоа.

„Индиректните докази дека обвинетиот го нападнал Кирк поради верувањата на обвинетиот или перцепциите за политичките убедувања на Кирк се неоспорни“, наведуваат обвинителите во нивниот писмен аргумент за тоа зошто имало доволно докази за да се осуди Робинсон за убиството на Кирк. Тие, исто така, наведоа пораки врежани на куршумите пронајдени во наводното оружје за убиство, од кои еден гласел „Еј, фашисто, зграби го“.

Робинсон наводно бил во врска со неговиот цимер, Ленс Твигс, кој размислувал за операција за промена на полот.

Адвокатот на Робинсон му рече на судот претходно овој месец дека писмото на Енгелхардт не дава докази дека Робинсон не се согласува со политичките или религиозните ставови на Кирк и не фрла светлина врз менталната состојба на Робинсон.

Одбраната има три недели да поднесе писмени аргументи зошто верува дека нема доволно докази за да се осуди Робинсон.

Судијата на Окружниот суд во Јута, Тони Граф, ќе одржи расправа за ова прашање на 1 септември. Робинсон, кој е во притвор од апсењето, сè уште не се изјаснил за виновен.