Иран ги прогласи аргентинската морнарица и воздухопловни сили за терористички организации

Техеран ги прогласи морнарицата и воздухопловните сили на Аргентина како „терористички организации“, соопшти денеска иранското Министерство за надворешни работи, одговарајќи на одлуката на Буенос Аирес од април да го прогласи Иранскиот корпус на револуционерна гарда (ИРГЦ) за терористичка организација.

Аргентина донесе таква одлука откако администрацијата на американскиот претседател Доналд Трамп ги охрабри своите сојузници да го сторат тоа.

Иранското Министерство за надворешни работи објави дека „врз основа на принципот на реципроцитет“, официјален Техеран ги смета аргентинската морнарица и воздухопловните сили за терористички организации.

„Очигледно е дека аргентинската влада ќе ја сноси одговорноста за сите последици што произлегуваат од ова“, се наведува во соопштението на министерството, без понатамошно разјаснување. 

Во соопштението за медиумите не се споменува аргентинската копнена армија.

Аргентина во април објави дека нејзината одлука да ја прогласи ИРГЦ за терористичка организација е донесена поради поддршката што иранската војска му ја дава на либански Хезболах.

Хезболах во Буенос Аирес е одговорен за најсмртоносниот терористички напад во историјата на Аргентина – бомбардирањето на Еврејскиот центар AMIA во главниот град Буенос Аирес во 1994 година, во кое загинаа 85 лица, а стотици беа повредени.

Иранската револуционерна гарда е елитна воена формација задолжена за заштита на клерикалниот систем на владеење во Иран, а значајни делови од иранската економија се исто така под нејзина контрола.