ПФЛ: Во Битола без победник, Тиквеш убедлив во Струмица

Денешните два натпревара од 15.коло од Првата фудбалска лига донесоа квалитетен фудбал. Во Битола Пелистер не успеа да ја продолжи серијата победи откако со Македонија ЃП одигра нерешено 1:1. Притоа гостите имаа водство со голот на Христијан Пецов во 18.минута, а битолчани изедначија во 63.минута преку Лука Булатовиќ. До крајот на дуелот двете екипи пропуштија шанси да дојдат до победата.

Во Струмица Тиквеш оствари убедлива победа во дуелот со домаќинот Брера со 4:0. Тимот од Кавадарци постигна по два гола во секое полувреме. Стрелци во првиот дел беа: Иван Ивановски (14.минута) и Мартин Стојанов (35.минута), а истиот фудбалер го постигна и третиот гол (негов втор) во 77.минута, додека конечните 0:4 ги постави Благој Стојчев (90+3.минута). Тиквеш со новите три бодови ја мина Брера на табелата и сега е на седмото место со 18 бодови.

На вчера одиграниот натпревар Силекс – Арсими 1:3.

Утре играат: Струга – Башкими и Вардар – Шкупи, а во понеделник на распоред е натпреварот Шкендија – Работнички.