Болсонаро го напуштил Бразил преку Аргентина и Еквадор, соопштија аргентинските власти

Бразилскиот сенатор Флавио Болсонаро ја напушти земјата по поразот на претседателските избори во неделата, минувајќи низ Аргентина и патувајќи со приватен авион до Еквадор, објавија денеска аргентинските власти, цитирани од француските медиуми.

Според бразилските медиуми, неговата крајна дестинација се САД.

Синот на поранешниот бразилски претседател Жаир Болсонаро ја преминал копнената граница со Аргентина „со редовни патни документи, без никакви законски пречки“, според соопштението на аргентинската национална дирекција за миграција, објавено на социјалната мрежа Икс.

Потоа Болсонаро се качил на приватен авион управуван од „Baires Fly S.A.“, летајќи до градот Гвајакил во Еквадор, соопштија аргентинските власти.

Според бразилските весници „Глобо“ и „Folha de São Paulo“, политичките сојузници на Болсонаро потврдија дека тој се качил на авион за САД, меѓутоа, тие не ги именуваа своите извори.

Раководството на Либералната партија на Болсонаро свика состанок во своето седиште во главниот град Бразилија, но сè уште официјално не го потврди неговото заминување. Ниту прес-службата на сенаторот, ниту неговите адвокати не ги коментираа извештаите.

Претходно, американските медиуми „Вашингтон пост“ и „Си-ен-ен“ објавија дека Болсонаро синоќа пристигнал во САД, повикувајќи се на анонимни извори запознаени со ова прашање.

Американскиот претседател, Доналд Трамп, изјави дека го одобрува пристигнувањето на Болсонаро во САД.

„Би го одобрил. Мислам дека се добри луѓе. Изборите беа многу чудни и мислам дека беа ужасни“, им рече Трамп на новинарите во воздухопловната база „Ендрус“ во Мериленд, цитиран од британските медиуми.

Во меѓувреме, висок функционер на американскиот Стејт департмент изјави за американските медиуми дека Вашингтон ќе им издаде визи на Болсонаро и неговото семејство и ќе им дозволи влез во земјата.

Ден по неговиот пораз на претседателските избори од актуелниот претседател Луиз Инасио Лула да Силва, судијата на Врховниот суд, Александар де Мораиш, му нареди на Флавио Болсонаро да ги предаде пасошите во рок од 24 часа и му забрани да ја напушти земјата.

Сенаторот првично вети дека ќе ја почитува судската наредба, опишувајќи ја како „обид за заплашување“. Сепак, тој не ги предаде своите документи до крајниот рок, а вчера Федералната полиција официјално му ги одзеде обичните и дипломатските пасоши, објави бразилската државна агенција Agência Brasil, цитирана од EFE.

Според документ од италијанскиот парламент Болсонаро има и италијанско државјанство од 2023 година.

Сенаторот (45) е под истрага на Врховниот суд под сомнение за перење пари, објавија бразилските весници „Estado di São Paulo“ и „Глобо“. Истрагата се спроведува зад затворени врати.

Во центарот на неа е адвокатот Вилер Томас, близок пријател на Болсонаро, кој е осомничен за водење мрежа на компании вклучени во сомнителни финансиски трансакции поврзани со спортско обложување.

Според полициските документи цитирани од бразилските медиуми, Флавио Болсонаро бил наведен како корисник со целосни административни права на заедничката сметка со Томас. Адвокатот е под истрага и во врска со корупциски скандал поврзан со нелегални одбитоци од пензиите на милиони пензионери.

Болсонаро негира какво било незаконско дело и го обвинува судијата Де Мораиш дека е пристрасен кон Лула.

Бразилскиот претседател вчера изјави дека би било „срамно“ доколку неговиот политички ривал ја напушти земјата и се пресели во САД, но нагласи дека нема прецизни информации за неговото местоположба.

Флавио Болсонаро сè уште не го признал поразот на вториот круг од претседателските избори во недела, на кои Лула беше реизбран со 52 отсто од гласовите. Поранешниот кандидат изјави дека ќе бара поништување на резултатите поради наводни нерегуларности, но неговата партија веќе го призна реизборот на актуелниот претседател.

Неговиот татко, Жаир Болсонаро, отслужува 27-годишна затворска казна во домашен притвор за обид за државен удар по поразот на претседателските избори во 2022 година.