Почина Билјана Плавшиќ, поранешна претседателка на Република Српска и осудена воена злосторничка

Поранешната претседателка на Република Српска (РС) Билјана Плавшиќ, осудена во Хаг за злосторства против човештвото за време на војната во Босна и Херцеговина, почина во Белград на 96-годишна возраст, објавија денеска српските медиуми.

За време на војната во Босна и Херцеговина, Билјана Плавшиќ беше потпретседателка на Република Српска и беше близок соработник на воениот лидер на босанските Срби, Радован Караџиќ, кого подоцна го наследи како претседател на РС.

Меѓународниот кривичен трибунал за поранешна Југославија во 2003 година ја осуди Плавшиќ на единаесет години затвор откако ја прогласи за виновна за злосторства против човештвото извршени за време на војната во Босна и Херцеговина. Претходно се изјасни за виновна за прогон врз политичка, верска и расна основа.

Според судската пресуда, таа учествувала во кампања на етничко раздвојување и прогон на несрпското население (Бошњаци и босански Хрвати) во 37 општини во Босна и Херцеговина.

Таа беше ослободена во 2009 година откако отслужи две третини од казната што ја отслужи во Шведска и оттогаш живее во Белград.

Таа е единствената жена осудена за воени злосторства од Хашкиот трибунал.

Според најавите, Плавшиќ ќе биде погребана во Бања Лука.