Министерот Серафимовски со претставници на винарската индустрија: Инклузивен дијалог за поквалитетен и поконкурентен вински сектор

Министерот за земјоделство, шумарство и водостопанство Борче Серафимовски одржа работна средба со претставници на винарници членки на здружението „Вина од Македонија“, како и со претставници на други поголеми винарници.

На средбата, како што соопшти МЗШВ, се разговарало за актуелните состојби и предизвици во секторот, како и за потребата од координиран пристап меѓу институциите и винарската индустрија.

Министерот Серафимовски ја истакнал подготвеноста на Министерството за земјоделство, шумарство и водостопанство да води инклузивен и континуиран дијалог со сите засегнати страни, насочен кон заеднички, реални и одржливи системски решенија.

На средбата посебен акцент бил ставен и на потребата од понатамошно унапредување на стандардите, квалитетот на финалниот производ и конкурентноста на винарската индустрија.

Се разговарало за можностите за зацврстување на позицијата на македонското вино на постојните странски пазари, како и за отворање нови извозни можности.

– Квалитетот и заедничката промоција се основа за посилно меѓународно позиционирање на македонското вино – истакна на средбата министерот Серафимовски.