ЕУ го чувствува товарот на нарушените односи на Берлин со Париз и Варшава

Table.media

Поради раскинатото партнерство меѓу германскиот канцелар Фридрих Мерц и францускиот претседател Емануел Макрон, односите меѓу Германија и Франција се далеку од хармонични, а длабок јаз постои и во односите со источниот сосед Полска, оценува берлинскиот портал Table.media.

Порталот проценува дека со завршувањето на оваа година меѓу Мерц и Макрон има многу повеќе несогласувања отколку согласувања, „иако и канцеларот и претседателот се страствени Европејци“.

Како примери за несогласување, се наведуваат договорот за слободна трговија со земјите од Латинска Америка – Меркосур, финансирањето на Украина, ставот за разговорот со рускиот претседател Владимир Путин и заедничкиот проект на Идниот борбен воздушен систем (FCAS).

Во моментов, меѓу Париз и Берлин, не преовладува хармонија, туку ривалство, а претходните хармонични односи на двете големи земји редовно придонесуваа за смирување на какви било несогласувања меѓу членовите на Европската Унија, пишува порталот.

Според table.media, Мерц неодамна се обидел да обезбеди водечка улога за Германија во меѓународните односи, но Макрон му возвратил, бидејќи смета дека таквата улога ѝ припаѓа на Франција.

Да, од друга страна, поради внатрешнополитичките проблеми во Франција, рацете на Макрон се многу повеќе врзани од оние на Мерц, дури и кога станува збор за многу помали прашања од војната и мирот.

Германскиот портал проценува дека ситуацијата меѓу двете земји веројатно нема да се подобри ниту во новата година, туку може да стане уште покомплицирана бидејќи претседателските избори во Франција треба да се одржат најдоцна до пролетта 2027 година.

Кога станува збор за источниот сосед, Полска, постои јаз што не може ниту да го поништи личното пријателство и почитување на канцеларот Мерц и полскиот премиер Доналд Туск, пишува table.media.

Според порталот, двајцата се согласуваат во најголема мера за стратешките прашања. Така, двајцата сакаат да ѝ помогнат на Украина со руски пари што се замрзнати во ЕУ, двајцата се за зајакнување на источното крило на НАТО и се ангажирани за зајакнување на транспортните врски меѓу Германија и Полска.

Меѓутоа, во Полска, граничните контроли воведени од германскиот министер за внатрешни работи, Александар Добринт, предизвикаа големо негодување, а Варшава не потраја долго време да возврати.

Односите се нарушени од континуираната дебата во Полска за воените репарации што Берлин треба да ги плати, а новиот национал-популистички претседател на Полска, Карол Навроцки, прави сè за да го попречи Туск и неговата политика и дома и во странство.

Туск лично не е наклонет кон барањето на опозициската партија Право и Правда (ПИС), со која Навроцки е многу близок, Германија да плати 1.500 милијарди евра отштета за злосторствата на нацистите во Втората светска војна.

Истовремено, Туск не смее да остави впечаток на попустливост кон Берлин, оценува порталот.