Димитриевски: Овој дрес и Македонија заслужуваат да дадеме се од себе

Голманот на македонската фудбалска репрезентација Столе Димитриевски и покрај трите примени гола беше најдобриот поединец во нашиот состав на дуелот со Швајцарија во Скопје. Македонскиот национален тим пред сè одбраната повторно ќе биде на испит и на утрешниот дуел со Словенија во Љубљана.

– Знаеме дека не одигравме на посакуваното ниво против Швајцарија. Разговаравме меѓу себе и сега мора да покажеме реакција. Имаме малку време меѓу натпреварите, но мора да се подготвиме, да се поддржиме и максимално да одговориме на задачата. Овој дрес и Македонија заслужуваат да дадеме се од себе. Јас се надевам дека ќе ја завршам мојата работа, ќе ја сочувам мрежата и дека заедно ќе одиграме добар натпревар. Ни требаат неколку квалитетни меча за да ја подигнеме самодовербата, изјави Димитриевски.

Интересен е факт што двајцата голмани се членови на екипи од шпанската Ла Лига, Столе Димитриевски на Валенсија и Јан Облак на Атлетико Мадрид.

Почетокот на дуелот што се игра во Љубљана е во 20:45 часот.