Шведска ги удвојува затворските казни за кривични дела поврзани со банди

Шведска воведе построги казни за кривични дела поврзани со банди, овозможувајќи им на судовите да изрекуваат затворски казни до двапати подолги од претходно, додека земјата се пресметува со организираниот криминал.

Според новиот закон, кој денеска стапи во сила, членовите на банди осудени за одредени прекршоци може да се соочат со казни до двапати поголеми од претходниот максимум.

На пример, член на банда фатен со огнено оружје претходно се соочуваше со максимална затворска казна од четири години, но сега може да добие и до осум години, пренесува шведската новинска агенција ТТ.

Построгите правила за казните важат и за малолетните сторители, иако законодавството задржува одредби со кои се овозможуваат намалени казни за малолетници.

Шведска со години се бори да го запре насилството меѓу бандите, при што криминалните мрежи сè повеќе регрутираат тинејџери за извршување нарачани убиства.

Сепак, по години на ескалација на насилството, бројот на фатални престрелки и други кривични дела со оружје оваа година се намали на споредбено ниско ниво, пренесе ДПА.

Законодавството е делумно моделирано според соседна Данска, каде што за кривичните дела поврзани со банди одамна се изрекуваат построги казни.

Според новите правила, максималната удвоена казна е ограничена на 18 години затвор.

Оваа мерка е дел од поширокиот пакет реформи во кривичното правосудство со кој се зголемуваат казните за околу 50 кривични дела.

Законодавството беше одобрено од шведскиот парламент во средината на јуни.

Законот се покажа како контроверзен, при што дел од правните експерти тврдат дека подолгите затворски казни веројатно нема да бидат ефикасно средство за одвраќање од криминалот поврзан со банди.