Илјадници луѓе учествуваа на Маршот на независноста на 108-годишнината од независноста на Полска

Повеќе десетици илјади луѓе се собраа денеска во Варшава на традиционалниот Марш на независноста по повод 108-годишнината од независноста на Полска, а во колоната учествуваше и претседателот на земјата Карол Навроцки, додека полициските сили беа во состојба на зголемена подготвеност поради неодамнешните смртоносни пукања во Краков и политичките тензии во земјата.

Маршот традиционално се одржува на 11 ноември, на денот кога Полска го одбележува враќањето на независноста во 1918 година, по 123 години поделеност меѓу Русија, Прусија и Австрија.

Учесниците носеа полски знамиња и беа облечени во националните бои, црвена и бела, додека за време на собирот извикуваа пароли „Слава на голема Полска“, „Чест и слава на хероите“, како и овогодишниот слоган на маршот „Полјак во Полска – херој“.

Претседателот Навроцки ја предводеше колоната и се фотографираше со учесниците, а го напушти маршот откако толпата го премина мостот преку Висла и се приближи до Националниот стадион, пренесува полската новинска агенција ПАП.

Премиерот на Полска, Доналд Туск, по повод државниот празник повика на национално единство, порачувајќи дека, и покрај тешките денови низ кои мина земјата, 11 ноември треба да биде ден кога „сите срца се бело-црвени“.

Градоначалникот на Варшава, Рафал Тшасковски, изјави дека поединечни учесници ја прекршиле забраната за употреба на пиротехника, но дека собирот во целина поминал мирно.

Полицијата соопшти дека биле подготвена да го обезбеди собирот и дека уапсила осум лица поради објавување информации за кои се сомнева дека имале за цел создавање атмосфера на страв. На учесниците им беше забрането носење оружје, а на поединечни улици во центарот на градот беа поставени бетонски бариери.

Варшава е под засилени безбедносни мерки по смртоносното пукање во Краков, вториот по големина град во Полска, во кое во саботата беа убиени шест, а ранети 15 лица.

Овогодишниот марш се одржа и во екот на политичкиот судир меѓу владата на премиерот Доналд Туск и опозицијата околу Уставниот суд, чиј легитимитет е оспорен поради спорните именувања судии за време на претходните десничарски влади. Владејачката коалиција тврди дека сака да ги исправи политичките реформи и именувањата кои ги смета за спротивни на демократските стандарди, додека опозицијата го обвинува Туск за поткопување на уставниот поредок.