Излезните анкети во Израел покажуваат водство на Ликуд на Нетанјаху, но нема јасен победник

Изборите во Израел во вторникот завршија без јасен победник, покажаа излезните анкети на главните телевизиски мрежи, при што ниту премиерот Бенјамин Нетанјаху, ниту неговиот главен ривал Гади Ајзенкот не се на пат да освојат мнозинство во Кнесетот со 120 места.

Според излезните анкети на главните телевизиски мрежи во Израел, блокот на опозицискиот противник Гади Ајзенкот освои најмногу места, помеѓу 50 и 53, тесно пред владејачката коалиција со 50, но сепак далеку под потребното мнозинство.

Се очекува Ликуд на Нетанјаху да биде најголемата поединечна партија во израелскиот парламент со меѓу 24 и 25 места, по што следи Јашар на Ајзенкот со меѓу 21 и 23 места, според анкетите на трите главни телевизиски мрежи.

Арапските партии во Израел освоија рекорден број места.

Официјалните резултати ќе почнат да се објавуваат во 22 часот по средноевропско време, но се проценува дека околу 600.000 гласови дадени преку специјални гласачки ливчиња, речиси сите од војската, или околу 10 отсто од вкупниот број, нема да бидат целосно преброени до четврток.

Откако ќе бидат објавени сите резултати и ќе бидат консултирани сите политички групи, израелскиот претседател го повикува лидерот на партијата за кој смета дека има најдобри шанси за успех да се обиде да формира влада. Овој процес може да потрае неколку недели.

Политичкиот ќорсокак би можел да му оди во прилог на Нетанјаху, дозволувајќи му на долгогодишниот премиер да остане на власт со технички мандат додека партиите се обидуваат да формираат владина коалиција, проценува Reuters.

Нетанјаху е лидерот со најдолг стаж во Израел, откако помина 19 години на власт. Неговата националистичка политика е сè поцврсто вкоренета, а поради фрагментираната држава, тој би можел да биде во најдобра позиција да формира влада.

Нетанјаху водеше кампања за своето воено лидерство и сојуз со американскиот претседател Доналд Трамп, кој го поддржа и застана на страната на Израел кога го нападна Иран. Нетанјаху во неделата изјави дека Трамп е подготвен повторно да дејствува за „конечно“ да ја отстрани иранската закана, но само доколку Нетанјаху остане на власт.

Ајзенкот го обвини Нетанјаху дека „се потпира на кампања на ширење страв, лаги и закани“ и изрази верување дека Трамп „целосно ќе соработува со секој лидер што ќе го избере народот“.

Овие избори доаѓаат по еден од најтурбулентните периоди во Израел од неговото основање во 1948 година, период обележан со траумата од нападот на Хамас на 7-ми октомври 2023 година, израелската воена офанзива во Газа како одговор и длабоките внатрешни поделби околу политиките на десничарската влада на Нетанјаху.

За многу од противниците на Нетанјаху, клучното прашање на овие избори е одговорноста за безбедносните пропусти на 7-ми октомври, најсмртоносниот ден во израелската историја.