Малолетник обвинет за тероризам во Сиднеј, откриени планови за насилство

Шеснаесетгодишно момче е уапсено во Сиднеј и обвинето за повеќе кривични дела поврзани со тероризам откога наводно „изложило планови за насилни дејства“ на интернет, соопшти Австралиската федерална полиција (АФП).

Тинејџерот бил уапсен во декември во западниот дел на Сиднеј кога полицијата запленила преклопен нож и „гел-бластер“. Подоцна му биле подигнати обвиненија за поседување неовластен пиштол и забрането оружје за што се предвидени казни до 14 години затвор.

АФП соопшти дека на неговите електронски уреди подоцна биле пронајдени „информации поврзани со екстремистичко насилство“.

„Ќе се тврди дека младото лице имало мешана идеологија и изложило планови за насилни дејства“, се наведува во соопштението.

Младиот човек е обвинет за пет дела поврзани со тероризам, вклучително и собирање и изработка на документи „кои може да олеснат терористички акт“ за што се предвидува казна до 15 години затвор за секое дело.