ЕК: Одлуката на Словачка за цените на дизелот претставува дискриминација и го крши правото на ЕУ

Европската комисија предупреди дека одлуката на словачката влада да воведе различни цени на дизелот за возачи со словачки и со странски таблички во период од 30 дена претставува дискриминација и е спротивно законите на Европската Унија.

Возачите со странски регистарски таблички во Словачка сега плаќаат во просек 1,83 евро за литар дизел, што е речиси 20 проценти повеќе од цената што ја плаќаат домашните потрошувачи.

Портпаролот на ЕК, Рикардо Кардозо, истакна дека мерките на земјите членки во вакви ситуации мора да бидат координирани и не смее да ги дискриминираат возачите врз основа на државјанство. Тој посочи дека Комисијата ќе преземе правни чекори за да обезбеди усогласеност со законодавството на ЕУ.

Словачкиот премиер Роберт Фицо претходно изјави дека не очекува ЕК да поведе формална постапка бидејќи регулативата е воведена привремено, само на 30 дена, но одлуката веќе привлекува значително внимание во Брисел.

Владата на Словачка воведе различни цени на дизелот со цел да ги заштити домашните потрошувачи и да ги спречи возачите од други земји, особено од Полска, да полнат гориво во Словачка по пониски цени.

Претходните искуства на ЕУ со слични случаи покажуваат дека Брисел реагира бргу.

Европската комисија во 2022 година поведе постапка против Унгарија поради слична практика на дискриминација на странски возила при купување гориво кога домашните возачи на бензинските пумпи плаќаа 60-70 отсто помалку од странците.