Национален собир и Непокорена Франција повторно поднесоа барање за гласање за недоверба на француската Влада

Француската крајно десничарска партија Национален собир и радикалната левичарска Непокорена Франција поднесоа одделни предлози за гласање недоверба на владата во знак на протест против неодамна усвоената Повеќегодишна енергетска програма (PPE) со декрет, објавија француските медиуми.

Таа програма ги утврдува главните насоки за потрошувачката и производството на електрична енергија за секој енергетски сектор (нуклеарна, ветерна, сончева, хидроелектрична) и на тој начин им овозможува на различните засегнати страни да предвидат проекти и инвестициски потреби.

Третата PPE, која го опфаќа периодот 2025-2035 година, беше презентирана на 12 февруари од премиерот Себастијан Лекорни.

Премиерот даде посебно место на нуклеарната енергија, потврдувајќи ги амбициите на претседателот Емануел Макрон да го оживее секторот, на штета на ветерната и сончевата енергија.

Од моментот кога беше презентиран, планот за енергетска политика беше остро критикуван од лидерката на крајната десница, Марин Ле Пен, која потоа го оцени како сериозна грешка од страна на премиерот и се закани дека ќе побара гласање недоверба на владата.

Тоа барање беше поднесено денес, изјавија пратениците од екстремната десница.

Неколку часа подоцна, претседателката на парламентарната група на „Непокорена Франција“, Матилда Панот, соопшти дека е поднесен предлог за гласање недоверба, наведувајќи ја истата причина – повеќегодишната енергетска програма.

Овие две партии протестираат затоа што програмата беше усвоена со декрет без дискусија во парламентот.

Досега, сите предлози за гласање недоверба на владата на Лекорни не успеаја.