Галатасарај сака да го ангажира Угарте од Манчестер јунајтед

Турскиот шампион Галатасарај сака да го засили средниот ред во зимскиот преоден рок со фудбалерот на Манчестер јунајтед, Мануел Угарте (24), јавија денеска британските медиуми.
Намерата на Галатасарај е да го донесе Угарте на шестмесечна позајмица со можност за откуп на договорот на крајот од сезоната, за сума од 20 милиони евра.
Уругвајскиот интернационалец оваа сезона одигра 12 натпревари за Манчестер Јунајтед, но само три пати беше во почетниот состав.
Галатасарај е лидер во турското првенство, со три бодови повеќе од второпласираниот Фенербахче, додека по шест кола од Лигата на шампиони со девет бодови е на 18. место кое му обезбедува плејоф за пласман во осминафиналето.