Јужна Кореја побара извинување од Украина за објавувањето на тајниот договор за севернокорејските војници

Јужна Кореја побара официјално извинување од Украина откако претседателот на земјата, Володимир Зеленски, откри детали за тајниот трансфер на двајца севернокорејски воени затвореници во Јужна Кореја.

Зеленски минатата недела пред Генералното собрание на ОН изјави дека Украина неодамна ги префрлила мажите во Јужна Кореја, откако биле заробени на бојното поле во конфликтот меѓу Украина и Русија на почетокот на 2025 година.

Јужнокорејскиот претседател Ли Џе-мјунг веднаш ја обвини Украина за кршење на договорот за доверливост во врска со трансферот.

Украина негираше постоење на таков договор.

Сонг Ги-хонг, виш претседателски советник на јужнокорејскиот претседател за односи со јавноста, доцна синоќа изрази „длабоко жалење“ за последните постапки на Украина и побара официјално извинување и објаснување.

Министерството за надворешни работи на Јужна Кореја денеска го повика амбасадорот на Украина во Сеул, Андриј Вјешкин, во знак на протест поради она што го окарактеризира како „еднострано откривање“ на информации за трансферот на затвореници од страна на Киев, како и лажните негирања дека двете земји се согласиле случајот да го чуваат доверлив.

Вешкин рече дека ќе го пренесе ставот на Сеул на неговата влада, се наведува во соопштение на министерството.

Сонг рече дека „лажното“ негирање на договорот за доверливост од страна на Украина е „чин што сериозно ја поткопува довербата меѓу двете влади и предизвикува значителна штета на пријателските односи меѓу двете земји“.

Сонг рече дека договорот е постигнат затоа што Сеул е загрижен за безбедноста на севернокорејските војници и нивните семејства на Северот, додека Киев е загрижен за можните критики во земјата за пропуштање на можноста да ги размени за украински војници што се држат во руско заробеништво.

Сеул ја повика Украина да не ги враќа во Северна Кореја, каде што би можеле да се соочат со прогон.

Јужна Кореја законски го третира Северот како дел од својата територија и спроведува политика на прифаќање и финансиска поддршка на севернокорејските дезертери.

Повеќе од 34.000 Севернокорејци избегале во Јужна Кореја од крајот на Корејската војна (1950–1953), главно во текот на последните три децении