(Видео) Ренесансни слики со непроценлива вредност украдени од музеј во Италија

Во музеј на Сицилија, украдени се четири слики со непроценлива вредност од Ренесансата, соопшти италијанскиот министер за култура, Алесандро Џулио.

Надлежните потврдија дека три панели од „Полиптихот на Свети Григориј“ од 1473 година, како и двострана плоча со прикази на Богородица и распнатиот Исус Христос, биле украдени од Регионалниот интердисциплинарен музеј во градот Месина, во саботата навечер. Уметничките дела му се припишуваат на сицилијанскиот ренесансен сликар Антонело да Месина. Полицијата истражува како крадците успеале да влезат во музејот без да го активираат алармниот систем, како и идентитетот на лицата кои би можеле да стојат зад кражбата. Истражителите веруваат дека сликите се украдени во име на крадци на уметнички дела со врски со црниот пазар, објавуваат италијанските медиуми.

Инцидентот е најновиот во низата грабежи во музеи низ Европа. Градоначалникот на Месина, Федерико Базиле изјави дека е длабоко огорчен од овој грозоморен криминален чин.

– Наследство што им припаѓа на сите граѓани на Месина е оштетено. Месина нема да дозволи нејзината историја да биде украдена, рече тој.

Сликата на Богородица е земена директно од заштитена витрина.

Директорката на музејот, Мариса Меркурио изјави оти случајот е шокантен и се верува дека кражбата се случила на 15 август околу 21:50 часот по локално време. Таа ја опиша кражбата како „голема загуба за музејот, градот, локалната заедница и уметничкиот свет“, воопшто.

Антонело да Месина бил сликар од 15 век – роден и израснат на Сицилија, кој подоцна станал еден од најважните мајстори на раната Ренесанса. Неговиот „Полиптих на Св. Григориј“, насликан 1473, ја прикажува Дева Марија со бебето Исус в раце, опкружена со Св. Григориј, Св. Бенедикт и бројни ангели. Уметничкото дело, од коешто се зачувани пет панели, првично било нарачано за манастирот „Санта Марија“.

Двостраната табла, којашто го прикажува малиот Христос како благословува верник држен во рацете на Дева Марија од едната страна, а возрасниот Христос по распнувањето од другата, е создадена приближно истовремено, иако точниот датум е непознат. Малите димензии укажуваат дека делото првично било наменето за лична богослужба.

Кражбата се случи само неколку дена откако италијанската единица за борба против кражба на уметнички дела објави дека пронашла три уметнички дела украдени претходно оваа година од музеј во близина на Парма. Прашањето за безбедноста на непроценливите уметнички дела и артефакти во европските музеи е актуелна тема од минатата година, кога група крадци провалија во „Лувр“ во Париз сред бел ден и украдоа накит во вредност од 88 милиони евра.