Доживотен затвор за Авганистанец кој лани со автомобил намерно усмрти мајка и дете и повреди повеќе лица во Минхен

Авганистанецот Фархад Н. (25) денеска е осуден на доживотна казна затвор затоа што со автомобил упаднал меѓу мирни синдикални демонстрации во Минхен во февруари 2025 година, при што загинаа мајка и нејзиното двегодишно дете, јави ДПА.

Високиот регионален суд во Минхен, кој ја објави пресудата, донесе пресуда за особено тешка вина, што значи дека веројатно нема да може да биде ослободен од затвор со условна казна по 15 години, што е вообичаено во Германија.

„Мора јасно да се каже дека делото имаше за цел да уништи човечки животи“, рече еден од двајцата претставници на канцеларијата на генералниот обвинител во својот завршен збор.

Мајката и нејзиното дете беа тешко повредени во удирањето со автомобил и починаа кратко потоа, потсетува германската агенција.

Бројни други лица беа повредени, некои од нив критично. Многумина сè уште страдаат сериозно, физички или психолошки, од последиците од нападот, а некои се неспособни за работа.

Советот го осуди обвинетиот, меѓу другото, по две точки од обвинението за убиство и обид за убиство во 23 случаи. Судската пресуда се совпадна со барањата на обвинителите, додека одбраната се залагаше за 15-годишна затворска казна и сместување во психијатриска нега.

Адвокатите на одбраната рекоа дека нивниот клиент покажувал јасни знаци на подтип на шизофренија позната како хебефренична или неорганизирана шизофренија, во која наместо заблуди, во преден план се збунет емоционален живот и непредвидливо однесување.

Но, претседателот на судот рече дека човекот сакал да нападне и случајно да убие луѓе во Германија како одговор на ситуацијата во исламските земји.

„Правејќи го тоа, обвинетиот сакал да изврши дело што му е угодно на Бога и да се докаже пред Алах, пред себе и пред своето семејство како добар муслиман.“

Според перцепцијата на обвинетиот, нападот бил во согласност со волјата на Алах и бил задолжителна реакција на постапките на САД и другите западни држави во Газа и Авганистан, тврдеше еден од обвинителите.

Личните емоции како што се лутина, разочарување и горчина одиграле улога, додаде тој.