ОН: Најмалку 30 жени уапсени во Авганистан поради наводно кршење на правилата за хиџаб

Најмалку 30 жени се уапсени во западниот авганистански град Херат поради наводно кршење на кодексот за облекување наметнат од администрацијата на талибанците, соопшти агенцијата на Обединетите нации за права на жените, додавајќи дека некои од нив подоцна биле ослободени.

Според ОН, апсењата биле извршени во деновите пред протестите во округот Инџил, по што имало собир против ваквите мерки, објавија британските медиуми.

Во соопштението се наведува дека талибанските безбедносни сили интервенирале за време на протестот и употребиле сила против демонстрантите.

Агенцијата на ОН тврди дека мажи, жени и деца учествувале во инцидентот и дека имало пукање во кое, според достапните информации, биле убиени најмалку две лица, вклучувајќи едно момче, додека повеќе од 20 лица биле повредени.

Во соопштението се додава дека апсењата дополнително го зголемиле стравот и вознемиреноста кај жените и девојките во Авганистан.

Локалните власти, контролирани од талибанците, ги негираа извештаите за апсења на жени како дел од мерките против правилата за хиџаб.

Откако ја презедоа власта во 2021 година, талибанските власти воведоа низа рестриктивни мерки против жените и девојчињата, вклучително и ограничувања во образованието, вработувањето и јавниот живот, што постојано предизвикуваше меѓународни критики и реакции од организациите за човекови права, истакнуваат ОН.