МНР на Иран: Примирејто со САД стана бесмислено

Иранското Министерство за надворешни работи остро ги осуди американските воздушни напади врз Техеран извршени во текот на ноќта наведувајќи дека овие напади го направиле договорот за прекин на огнот „практично бесмислен“.

Нелегалните и криминални напади на САД во изминатите неколку часа не само што претставуваат флагрантно кршење на Повелбата на Обединетите нации и основните правила на меѓународното право за почитување на националниот суверенитет и територијалниот интегритет на државите, туку и го направија прекинот на огнот постигнат на 8 април практично бесмислен“, се наведува во официјалното соопштение на Министерството, кое го пренесоа иранските медиуми.

Оваа остра реакција од Техеран дојде откако американската војска почна нов бран прецизни воздушни напади, втора ноќ по ред, користејќи ги морнарицата и авионите ловци за гаѓање цели во Иран, вклучувајќи ја покраината Алборз, но и цивилна инфраструктура, како што е водоводната станица во селото Бемани, на јужниот брег на земјата.

Вашингтон ги оправда овие операции со правото на самоодбрана по претходното соборување на американскиот хеликоптер „апачи“, а претседателот Доналд Трамп изјави дека нападите ќе продолжат со полн интензитет доколку Иран одбие да го потпише понудениот мировен договор.

Иран веднаш одговори на американските напади со масовни ракетни напади лансирајќи балистички ракети и беспилотни летала кон американските воени позиции и воздухопловни бази во Јордан, Кувајт и Бахреин.

И покрај жестоката дводневна размена на оган и привременото затворање на воздушниот простор во регионот, дипломатски извори потврдуваат дека преговорите за прелиминарен договор и одмрзнување на милијарди долари ирански средства сè уште се во тек, а катарските медијатори го напуштија Техеран дури утрово по целовечерните состаноци со иранските претставници.