Распишан конкурсот за доделување на државната награда „Свети Климент Охридски“

Одборот за доделување на државната награда „Свети Климент Охридски“ распиша конкурс за доделување на наградата во 2026 година – соопштија денеска од Министерството за култура и туризам.

Од таму потсетија дека со државната награда „Свети Климент Охридски“ се оддава највисоко признание за долгогодишни остварувања во областа на воспитанието, образованието, културата, уметноста, здравството, заштитата и унапредувањето на човековата околина и во социјалната дејност. Државната награда се доделува на поединци, група творци, екипи, установи, трговски друштва и здруженија на граѓани.

– Државната награда може да се додели и на странски државјани, група творци, екипи и институции од странство за долгогодишни остварувања што се од јавен интерес за Република Северна Македонија. Конкурсот ќе трае од 25 септември до 15 октомври. Конкурсот и пријавата се достапни на веб-страницата на Министерството за култура и туризам – се додава во соопштението.