Германија: Остар пораст на хоспитализирани девојчиња поради нарушувања во исхраната

Бројот на девојчиња на возраст од 10 до 17 години хоспитализирани во Германија поради нарушувања во исхраната повеќе од двојно се зголеми во текот на 20-те години до 2024 година, соопшти денеска Федералниот завод за статистика.

Бројот порасна од околу 2.800 во 2004 година на приближно 6.000 во 2024 година, се наведува во соопштението.

Остриот пораст значи дека уделот на девојчиња во оваа возрасна група лекувани од нарушување во исхраната во 2024 година чинеше речиси половина од сите лекувани пациенти со 48,1 процент, додека 20 години порано тој изнесуваше 24,9 проценти, пренесе ДПА.

Вкупниот број на луѓе лекувани од нарушувања во исхраната се зголеми за 2,2 отсто помеѓу 2023 и 2024 година на 12.400 случаи. Заводот соопшти дека најчести дијагнози во 2024 година биле за анорексија, со 9.000 случаи кои барале лекување, и булимија, со 1.300 случаи.

„Во сите возрасни групи, девојчињата и жените почесто се лекуваат болнички од нарушувања во исхраната отколку момчињата и мажите“, се наведува во соопштението.

Пред две години, 92,9 проценти од луѓето лекувани со оваа дијагноза беа од женски пол. Во 2004 година, уделот на пациентки од женски пол изнесувал 88,5 проценти.