Шефот на МААЕ поднесе кандидатура за највисоката функција во ОН, ветува прагматизам наместо држење предавања

Рафаел Гроси, шефот на нуклеарната агенција на ОН, изјави дека сака да стане генерален секретар на ОН преку трезвена дипломатија, а не со „мавтање со прст“.

Обраќајќи се на прес-конференција во Виена, тој рече: „Според мое мислење, генералниот секретар не е таму за да биде некаков лаички папа или судија. Генералниот секретар е таму за да ги решава проблемите“.

Аргентинецот (65), кој е на чело на Меѓународната агенција за атомска енергија (МААЕ), е една од најпознатите личности меѓу кандидатите, потсетува ДПА.

– Верувам во генерален секретар кој е практичен и директно вклучен на терен, повеќе отколку во некој кој крева прст и покажува со него – рече тој.

Актуелниот генерален секретар Антонио Гутереш е познат по тоа што отворено ги адресира наводните кршења на меѓународните правила, пристап кој во повеќе наврати го доведе во конфликт со Израел, меѓу останатите.

Гроси пред претставниците на меѓународните медиуми нагласи дека како врвен претставник на ОН, мора да остане во дијалог со високи политички личности. Доколку некој биде етикетиран како криминалец, дијалогот пропаѓа без да се реши кој било проблем.

Како пример за својот пристап, Гроси ја посочи својата посредничка улога меѓу Русија и Украина. Како шеф на МААЕ, тој договори неколку ограничени прекини на огнот во подрачјето на фронтот околу нуклеарната централа Запорожје, со цел да се овозможи извршување на поправки за да се спречи нуклеарна катастрофа. Притоа, тој избегнуваше да ја осуди Русија како окупаторска сила на украинската централа.

Вкупно пет кандидати се во трка за функцијата генерален секретар на ОН. Покрај Гроси, кандидати се и поранешната претседателка на Чиле и висок комесар на ОН за човекови права Мишел Бачеле; поранешната министерка за надворешни работи на Еквадор Марија Фернанда Еспиноза; поранешната потпретседателка на Костарика Ребека Гринспан; и поранешниот претседател на Сенегал Маки Сал.

Се очекува наследникот на Гутереш да биде избран пред крајот на годината.