Ирански официјален претставник тврди дека договорот со САД вклучува укинување на санкциите за нафта, нуклеарни ограничувања и одмрзнување на средства

 Конечниот нацрт-меморандум за разбирање меѓу Иран и САД опфаќа широк спектар на прашања – од иранската нуклеарна програма, па сè до обновувањето на водниот сообраќај низ Ормуската Теснина и ублажувањето на американските санкции за иранската нафта, изјави висок ирански официјален претставник.

Според него, по постигнувањето согласност за документот, двете страни ќе имаат рок од 60 дена за да го договорат конечниот договор.

Тој додаде дека нацртот предвидува Иран веднаш да ја отвори Ормуската Теснина за сите трговски бродови, а САД да ја прекинат поморската блокада на иранските пристаништа. Вашингтон исто така се обврзува дека нема да воведува нови санкции за Техеран до склучувањето на конечниот договор и привремено ќе го ослободи Иран од дел од ограничувањата за извоз на нафта, што ќе ѝ овозможи на земјата да ја продава својата суровина и да остварува приходи од неа.

Покрај тоа, САД се подготвени да одмрзнат 25 милијарди долара од замрзнатите ирански средства преку директни парични трансфери, соработка со земјите од регионот и обезбедување на финансиски кредитни линии.

Во замена за ова, Иран се обврзува дека нема да развива и да не набавува нуклеарно оружје. До постигнувањето на конечниот договор, Техеран ќе ја задржи моменталната состојба на својата нуклеарна програма, при што нема да збогатува ураниум и нема да ги проширува своите нуклеарни капацитети. Од своја страна, САД се согласуваат Техеран да го намали степенот на збогатување на своите резерви од високозбогатен ураниум на територијата на Иран, а механизмот за тоа ќе биде прецизиран во рамките на тие 60 дена.

Претходно, иранските медиуми јавија дека катарска делегација пристигнала во Техеран во обид да го забрза постигнувањето на мировниот договор меѓу Техеран и Вашингтон.