Шејнбаум: Позитивно отворање на Светското првенство и покрај протестите

Мексиканската претседателка Клаудија Шеијбаум извлече позитивни заклучоци од отворањето на Светското првенство во Мексико Сити, и покрај протестите што се одржаа пред натпреварот.

Мексико, кој е кодомаќин на турнирот, имаше совршен почеток со победа од 2:0 над Јужна Африка, пренесе ДПА:

„Со голема гордост ѝ честитам на нашата мексиканска репрезентација што ни ја донесе оваа историска радост и што му ја покажа на светот големината на Мексико, како на теренот, така и надвор од него“, рече Шејнбаум во соопштение.

„Да живеат нашите навивачи, да живее нашиот град и да живее Мексико“, рече претседателката, која го гледаше натпреварот на навивачки фестивал.

Сепак, различни групи го искористија настанот за да организираат протести. Наставниците излегоа на улиците поради долготрајниот спор околу пензиските реформи. Роднините на исчезнатите лица исто така протестираа на патиштата, барајќи побрзи истраги и правда за членовите на нивните семејства.

„Мексико Сити е град на права и слободи, бидејќи не само што групите кои сакаа да демонстрираат можеа да го сторат тоа, туку и пошироката јавност го имаше правото да учествува во фудбалските свечености или да оди на стадионот“, рече Шејнбаум.

Само неколку автомобили успеаја да се приближат до стадионот „Ацтека“ поради ограничената зона околу стадионот. Пристапните патишта во радиус од околу 1,6 километри беа целосно затворени. Градот ја поддржа оваа мерка со големо полициско присуство.