Пезешкијан и Калибаф бараат смена на шефот на дипломатијата на Иран

Иранскиот претседател Масуд Пезешкијан и претседателот на парламентот Мохамед Багер Калибаф бараат смена на министерот за надворешни работи Абас Арагчи, обвинувајќи го дека во нуклеарните преговори ги следел насоките на командантот на Корпусот на исламската револуционерна гарда.

Според извори запознаени со ситуацијата, Арагчи во последните недели дејствувал повеќе како соработник на Ахмад Вахиди отколку како министер задолжен за спроведување на владината политика. Ахмад Вахиди (68), ја презеде командата на Иранската револуционерна гарда откако неговиот претходник, Мохамед Пакпур, беше убиен во напад на 28 февруари 2026 година.

Изворите наведуваат дека во изминатите две недели тој не го информирал претседателот за своите активности, туку работел во целосна координација со Вахиди и постапувал според неговите директиви. Таквата состојба предизвика сериозно незадоволство кај Пезешкијан, кој наводно најавил дека ќе го разреши Арагчи доколку ваквата практика продолжи.

Извештаи за несогласувања меѓу политичкото раководство и воените структури се појавија и на 28 март, кога дошло до сериозен спор меѓу Пезешкијан и Вахиди околу водењето на војната и нејзините економски последици. Три дена подоцна, според истиот извор, Пезешкијан изразил фрустрација дека се наоѓа во „целосен политички ќор-сокак“ и дека му било ограничено правото да именува замени за загинатите владини функционери.

Според наводите, Вахиди истакнал дека поради критичната воена состојба сите клучни позиции треба привремено да бидат под директна контрола на Корпусот на исламската револуционерна гарда. Дополнително, се наведува дека Калибаф поднел оставка од позицијата шеф на иранскиот преговарачки тим со САД, откако бил опоменет поради обидите нуклеарното прашање да го вклучи во преговорите.

По неговото заминување, Арагчи настојувал да ја преземе водечката улога во преговорите и на 24 април отпатувал во Исламабад, каде што пренел предлог од Техеран, кој подоцна, според медиумите, бил одбиен од американскиот претседател Доналд Трамп. Група пратеници блиски до тврдокорниот политичар Саид Џалили, на 27 април одбија да потпишат парламентарна изјава за поддршка на преговарачкиот тим, и покрај тоа што документот го поддржаа 261 друг пратеник.