Мелони: Автоматското обновување на одбранбениот договор со Израел е суспендирано

Италијанската влада одлучи да го суспендира автоматското обновување на договорот за одбрана со Израел во контекст на актуелната ситуација – соопшти премиерката Џорџа Мелони на маргините на саемот „Винитали“ во Верона.

Министерот за одбрана Гвидо Крозето му испратил писмо на својот израелски колега Израел Кац со кое го известува за суспензијата на меморандумот меѓу Италија и Израел. Овој меморандум, кој воспоставува рамка за одбранбена соработка во размена на воена опрема и технолошки истражувања, беше предвиден за обновување на секои пет години, а првично стапи во сила на 13 април 2016 година.

На прес-конференцијата во Верона премиерката одговори и на коментарите на американскиот претседател Доналд Трамп за папата Лав XIV оценувајќи ги изјавите насочени кон понтификот како неприфатливи. Таа изрази солидарност со папата Лав додавајќи дека не би се чувствувала пријатно во општество во кое верските лидери го прават она што ќе го кажат политичарите.

На енергетски план, Мелони истакна дека мора да се биде многу внимателен во однос на рускиот гас. На меѓународно ниво, таа повика на продолжување на напорите за мировни преговори со цел стабилизација на ситуацијата и повторно отворање на суштинските снабдувања со гориво и вештачки ѓубрива, вклучително и преку клучните рути, како што е Ормуската Теснина.