Алегри по поразот од Лацио: Целта на Милан е да избори учество во Лигата на шампионите

Тренерот на Милан, Масимилијано Алегри, го коментираше поразот од 1:0 од Лацио на синоќешното гостување во натпреварот од 29-тото коло од италијанското првенство.

– Знаевме дека натпреварот ќе биде тежок, бидејќи домаќините имаа голема поддршка од навивачите. Тие одиграа многу силно прво полувреме. Требаше да бидеме малку поорганизирани и да правиме помалку грешки. Трчаа многу, а потоа забавија по паузата. Имавме многу поголем интензитет во второто полувреме, но не можевме да го претвориме тоа во гол. Тоа е фудбалот.

Она што дефинитивно треба да го направиме сега е да го притиснеме копчето за ресетирање. Луѓето зборуваа за Скудетото по победата над Интер, но мора да бидеме реални во животот. Треба да запомниме дека целта е да се квалификуваме за Лигата на шампионите, во спротивно ризикуваме да уништиме сè што сме изградиле во последните шест месеци, изјави Алегри за „DAZN“.

Милан, со 60 бода по 29 натпревари, е втор на табелата во италијанската лига.