Над милион домаќинства во Украина без струја по големиот руски ноќен напад

Повеќе од еден милион домаќинства во Украина останаа без електрична енергија по големиот руски напад во текот на ноќта врз енергетската мрежа и индустриските капацитети на земјата, јави Би-Би-Си, повикувајќи се на украинските власти.

Украинскиот министер за внатрешни работи, Игор Клименко, изјави дека во нападите биле погодени пет региони, при што биле повредени исто толку лица. Во тек се активности за гаснење на пожарите и за обнова на снабдувањето со електрична енергија.

Русија често ја таргетира енергетската инфраструктура на Украина од почетокот на војната, но ги засили нападите со доаѓањето на зимата, забележува Би-Би-Си.

Меѓу погодените региони е и јужната област Одеса, која, според локалните власти, била цел на најголемиот напад од почетокот на воениот конфликт пред речиси четири години.

Нападот беше извршен пред претстојните преговори во Берлин в понеделник, меѓу украинскиот претседател Володимир Зеленски, европските лидери и специјалниот пратеник на САД, со цел изнаоѓање начин за ставање крај на војната.