Одложена седницата на КК Партизан – неизвесна судбината на Обрадовиќ

Оставката на тренерот на КК Партизан Жељко Обрадовиќ и натаму е актуелна, а неизвесна е судбината за неговото останување на клупата на „црно-белите“. За денеска беше најавена седница на Управниот одбор, но поради отсуство на дел од членовите (се наоѓале во странство) седницата е одложена.

На понудената оставка на од страна на тренерот, раководството на клубот прво ја прифати, а потоа следниот ден ја одби. При враќањето од Атина неколку илјади навивачи на клубот го дочекаа Обрадовиќ во знак на поддршка и побараа да остане тренер на Партизан.

Претседателот на клубот Остоја Мијаиловиќ му даде потполна поддршка на Обрадовиќ, но по вчерашниот состанок присутните неофицијално пренесуваат дека тренерот не се предомислил. Една од причините е тоа што во преодниот рок, не биле донесени играчи кои тој ги посакувал. Од клубот вчера замина спортскиот директор Зоран Савиќ.