Раперот Прас Мишел осуден на 14 години затвор за нелегални донации за кампањата на Обама

Раперот – добитник на „Греми“ награда, Прас Мишел е осуден на 14 години затвор за нелегално пренасочување милиони долари странски пари кон кампањата на Барак Обама за повторниот избор во 2012 година.

Праказрел Семјуел – „Прас“ Мишел (53) се здоби со слава како еден од основачите на влијателната хип-хоп група „Фуџис“, заедно со Лорин Хил и Вајклиф Џин. Групата доминираше на музичката сцена во 1990-тите и продаде десетици милиони албуми, додека Мишел, исто така, освои „Греми“ за својата работа. Сепак, последниве години тој се најде во средиштето на еден од најголемите скандали за политичко финансирање во САД. Федералниот суд го прогласи за виновен во април 2023 година, по 10 точки од обвинението, вклучувајќи дејствување како нерегистриран агент на странска влада, заговор и кршење на законите за финансирање на кампањата.

Според обвинителството, Мишел нелегално пренасочил милиони долари од странско потекло кон кампањата на Обама.

Одбраната ја смета казната за „апсурдно висока“ и предложи тригодишна затворска казна. Мишел молчеше во судот, додека неговиот адвокат Питер Сајденберг рече дека изречената казна е „еднаква на онаа што ја добиваат терористите или водачите на нарко-картелите“. Одбраната, исто така, тврдеше дека американските правни прописи во вакви случаи налагаат „неправедни и неразумни“ казни.

Од друга страна, Министерството за правда побара доживотна казна затвор, наведувајќи дека Мишел „си ја предал државата за пари“ и „свесно и упорно лажел за да ја оствари својата агенда“. Обвинителите нагласија дека казната мора да го одразува „размерот и сериозноста на неговите злосторства и неговата целосна рамнодушност“ кон последиците по националната безбедност.

Барањето за ново судење претходно беше одбиено. Мишел тврдеше дека еден од неговите адвокати користел вештачка интелигенција за време на неговите завршни зборови, што, според него, негативно влијаело врз неговата одбрана. Судијата не го прифати тоа барање.