Украина ќе се консултира со партнерите за да се стави крај на војната, Зеленски го именува преговарачкиот тим

Украина ќе се консултира со своите партнери во наредните денови и заедно ќе разговараат за чекорите за запирање на војната, соопшти кабинетот на претседателот Володимир Зеленски.

Зеленски го одобри составот на делегацијата, која ќе ја предводи шефот на неговата администрација и ќе вклучува високи безбедносни функционери, се вели во соопштението на Телеграм.

Претседателот потпиша указ за формирање украинска делегација за учество во процесот на преговори со Соединетите Американски Држави и други меѓународни партнери, како и со претставници на Руската Федерација, за постигнување праведен и одржлив мир, објавија украинските медиуми, забележувајќи дека указот е објавен на веб-страницата на шефот на државата.

Делегацијата ќе ја предводи шефот на претседателскиот кабинет, Андриј Јермак. Во неговиот состав се вклучени секретарот на Советот за национална безбедност и одбрана Рустем Умеров, началникот на Главната дирекција за разузнавање (ГУР) на Министерството за одбрана Кирил Буданов, началникот на Генералштабот на вооружените сили на Украина Андриј Гнатов и други високи претставници.

-Украина никогаш нема да биде пречка за постигнување мир, а претставниците на украинската страна ќе ги бранат интересите на украинскиот народ и темелите на европската безбедност, нагласи претседателскиот кабинет во своето соопштение.