Истрага против писателот Мишел Уелебек поради наводно поттикнување дискриминација, омраза и насилство врз муслиманите

Француските правосудни органи почнаа истрага против писателот Мишел Уелебек поради сомневање за соучесништво во поттикнување дискриминација, омраза или насилство врз муслиманите, пренесе БТА.

Истрагата се води во Нантер и се однесува на интервју што Уелебек му го дал на филозофот Мишел Онфре, објавено во ноември 2022 година во списанието „Фронт популер“ (Front Populaire). Во интервјуто, авторот на романите „Покорни“ и „Елементарни честички“ упатил остри забелешки кон муслиманската заедница во Франција, претставувајќи ја, наводно, како закана за безбедноста на францускиот народ. Уелебек исто така укажал дека Французите не сакаат муслиманите да се асимилираат; тие „или мора да престанат да ги ограбуваат и напаѓаат Французите, или да ја напуштат земјата“, според него.

Писателот, исто така, зборувал за можноста од идни „напади, спротивни на оние во Батаклан“, насочени против муслиманите. Оваа изјава се однесува на исламистичките терористички напади во Париз од 13 ноември 2015 година, меѓу кои беше и нападот врз концертната сала „Батаклан“.

Во јануари 2023, Францускиот совет на муслиманската вера поднесе пријава против Уелебек, Онфре и уредникот на списанието, Стефан Симон, наведува ДПА.

Адвокатите на писателот ги отфрлија обвинувањата. Во коментар за весникот „Фигаро“ (Le Figaro), правниците истакнаа дека спорните изјави не содржат ниту директен, ниту индиректен повик за извршување такви дејствија, па затоа спаѓаат под заштитата на слободата на говорот.