Конститутивната седница на собранието на Србија е закажана за 17 ноември

Претседателката на Собранието на Србија, Ана Брнабиќ, ја закажа конститутивната седница на новиот, 15-ти по ред собраниски состав за вторник, 17 ноември 2026 година, со почеток во 10 часот, јави Бета.

На дневниот ред се предложени шест точки: потврдување на пратеничките мандати, избор на претседател и потпретседатели на Собранието, избор на генерален секретар, како и формирање на работните тела и постојаните делегации во меѓународните институции. Со конституирањето на Собранието и верификацијата на мандатите, почнува да тече и уставниот рок од 90 дена за избор на новата српска влада.

До изборот на нов претседател на парламентот, со конститутивната седница ќе претседава најстариот народен пратеник – професорот Стојан Раденовиќ од Српската напредна партија (од листата „Обединета Србија“), на кој ќе му помагаат четворица најмлади народни пратеници.

– Сакам да верувам дека Собранието и во наредниот период ќе биде место за сериозна дебата и одговорно одлучување. Важно е отворено да се разговара за сите прашања, различните ставови да се соочуваат со аргументи и да негуваме меѓусебно почитување и култура на дијалог – рече Брнабиќ, истакнувајќи дека е посебно важно да продолжи практиката на директни ТВ-преноси на седниците за да се обезбеди транспарентност. Таа посочи дека секое укинување на преносите, како што се случи минатата недела во Покраинското собрание, може да укажува на укинување на демократските принципи.

На парламентарните избори одржани на 25 октомври, најголем број мандати освои листата „Студентска листа – Студентите победуваат“, која ќе има 140 пратеници и апсолутно мнозинство во Собранието. Листата „Обединета Србија“, собрана околу поранешниот претседател на државата Александар Вучиќ, ќе има 103 пратеници. По двајца пратеници освоија Сојузот на војводинските Унгарци и Албанската коалиција, додека по еден пратеник ќе имаат листите на Расим Љајиќ, СДА Санџак и листата на Усама Зукорлиќ – Движење за обединување.